Aizawl khawpui ah tui harsatna ziaawm theilo, ngaiawh turin thla khat zet la ngai dawn

by News Editor

Tualchhung News

ZORAM TODAY| 5th July, 2024 (Fri): Cyclone Remal in May ni 28 a Aizawl khawpui tan a tui lakna hrang hrang a tihchhiat te tungding leh turin ngawrh taka hna thawh zel a nih thu vawiin a sorkar thuchhuah chuan a tarlang.

Tlawng tui dawtna hnawh thenfai hna a la kal zel a. Phase I, II & III a Tui pump khawl siam ngaite phaiah khawih mek a ni, an ti.

Phase II hi dan pangai a tui pump thei turin siamrem a ni tawh a. Phase-I hi Tlawng tui a dawtna la tha thei lo mahse Phase-II atanga pek thlakna tur ruahmanin, Phase-I pawhin khingbai takin tui a pump chhuak ve leh thei tawh bawk, an ti a.

Amaherawh chu, ruah tam zual laia tui nu lutuk thin hian lei nawi leh bawlhhlawh tam tak, pump-in tui a dawtna ah a rawn chhek luh zel thin avangin, chung bawlhhlawh tihfai nan chuan nitin hun engemawzat sen reng a la ngai a ni, tiin an tarlang.

Hengte avang hian nikhat a tui pump theih hun chhung a tam theilo a, nitin a tui litre mtd 30 vel pump thin khan tun dinhmunah hian Phase I & II atangin nikhatah tui litre mtd 16 vel chauh a pump chhuak thei a ni. Tui nut zual chang phei chuan hei pawh hi a phak theih thin loh a ni. Phase III (SIPMIU), nitina mtd 10 pump thin erawhin, tui pump thuai virtu Electric motor-te phaia siam a la nih avangin, tun thlengin tui a la pump thei rih lo.

Tui awm thei ang ang te chu June thla chhung khan sem kual a ni a. Veng thenkhat, tui la dawng ve lo te chu July thlaa pek hmasak ber tura ruahman a ni.

PHE Department chuan mipuite dawhtheihna leh hriatthiamnaah lawmthu a sawi a. Ngai awh leh turin thlakhat zet a la duh dawn avangin tui renchem leh ruahtui lo khawl zel turin mipui a ngen a ni, tiin an thuchhuah ah tarlan a ni.